Hövsan qəsəbəsində yerləşən Fövqəladə Hallar Nazirliyinin İdman Sağlamlıq Mərkəzində cüdo üzrə 15 yaşa qədər kiçik yaşlı yeniyetmələrin fərdi və komandalar arasında ölkə birinciliyi keçirilib. Yarışda 101 klub, cəmiyyət və idman təşkilatından olan 572 cüdoçu medallar uğrunda mübarizə aparıb.

Naxçıvan Muxtar Respublikasını yarışda cüdo üzrə yığma komandanın məşqçisi Orxan Quliyevin rəhbərliyi ilə 1 qız və 7 oğlan idmançı təmsil edib. Təmsilçilərimizdən Ləman Bağırova (Naxçıvan UGİM) ölkə birinciliyini 1 qızıl, 1 bürünc medalla tamamlayıb.

Qızların fərdi yarışında -36 kq çəki dərəcəsi üzrə çıxış edən Ləman üçüncülük görüşündə qalib gəlməklə bürünc medala sahib çıxıb. Komanda yarışında “Şuşa UGİM”-in heyətində tatami üzərinə çıxan cüdoçumuz daha uğurlu nəticəyə nail olub. Komandasının birinci olmasında önəmli payı olan cüdoçumuz üç görüşdə qələbə sevinci yaşayıb. Bu görüşlərin birində isə fərdi yarışın yarımfinalında cüzi fərqlə məğlub olduğu rəqibini bu dəfə ipponla üstələyib.

Xatırladaq ki, Ləman Bağırova ötən il 15 yaşadək cüdoçular arasında ölkə birinciliyinin qalibi kimi muxtar respublikada belə bir uğura nail olan ilk qız cüdoçu olmağı bacarmışdı. İdmançı həmin dövrdən etibarən ölkə və beynəlxalq səviyyəli yarışlarda uğurla çıxış etməkdədir.